文化沙龍

DECEMBER 4, 2023

早兩日去咗參加由 Hong Kong March 舉辦嘅文化沙龍，主辦方邀請咗《窄路微塵》、《少年》導演林森同《十年》導演伍嘉良對談，同大家探討吓點樣係英國繼續關注同傳承香港電影。

講起香港電影，大家最先諗起嘅究竟係周星馳嘅無厘頭、王家衛嘅光影美學、定係八、九十代嘅警匪片動作片？

其實近幾年，香港有一班新晉導演，拍咗好多「四字電影」，佢哋嘅取材同過往嘅港產片好唔同，聚焦社會議題，亦都藴含咗唔少嘅信息係入面。

身邊嘅朋友因為呢堆「四字電影」而開始多咗留意港產片，甚至有朋友話，港產片翻嚟了，作為香港人，好應該撐港產片。

冇錯，作為香港人，大家好應該支持香港嘅文化產業，但係係咪代表大家就要盲撐，只要係港產片就唔理好醜一律入場支持，甚至容不下任何一絲批評？

早兩日其中一位參加者正正就提出咗呢個疑問。

盲撐之首當選《明日戰記》。舊年大家以「唔想古天樂蝕本」為由紛紛入場支持，甚至一度將套戲推到上港產片票房冠軍嘅位置。戲入面嘅各種特效固然無話可説，但以戲論戲，《明日戰記》呢個票房冠軍真係實至名歸嗎？又例如《燈火闌珊》，枝節太多以致劇情支離破碎，甚至講話係張艾嘉一個人救咗成套戲。

新晉導演固然有佢唔成熟嘅地方，但盲撐究竟係幫緊定係害緊成個香港電影工業？猶如誇誇羣般盲目支持，容不下一絲批評，香港電影工業又點樣可以有所進步？